Bärtschi Bärtus Bärtu

Me sött nid jufle aus aute Bärner, das chunnt nid guet. Vorauem nid bim Rede. Me mues doch no chönne dängke bim Rede, oder? Gueti Gedanke, di bruche nämlech Zitt für sech z entwickle, o im schnäuschte Züriheguhirni.

Weiss scho, i passe nümm zu der juflige Zitt, wo mer hei. Wo sech d Kollege nid emau me Zitt nä für nes Bier nachem Fürabe oder für ne Schwatz uf dr Strass, we me nang zuefäuig begägnet. Aber aus mues Händy ha, Händy ha, s gitt nüt Wichtigers aus Händy ha:

‚Du los mi Zug hett füf Minute Verschpätig, i fahre itz grad bim Wankdorf düre, i chume grad, wartisch, gäu!’ –

‚Du, i bi itz grad vor der Peiz, wo bisch, wo hocksch? I gse di nii!’

Ja, u wettne mau uf ihres Händy wosch alütte, nämesis nid ab ihres verdammte Händy, oder es chunnt nume d Kombox. U meinsch si lütte einisch zrügg? A-a. Für au angere muesch immer grad seckle u für eim säuber chunnt e kene. So isch das. Aus hett plötzlech ds Gfüeu, me müess jufle u umesirache, me wird scho füdleschturm vom Zueluege.

Aber i ha immer gseit, das chunnt nid guet eso. U itz hei si der Dräck di Juflihüng überau, wo schnäus Gäud wei mache u di schnäui Rändite u überhaschteti Transaktione. Iu, itz gsemers! Di ganzi Wäutwirtschaft gheit no zäme wäge dene Juflibängker u Juflibörsianer. U miir söue de blüete, he!

Di ganzi Wäut sött Bärndütsch lehre, so isch das, de giengs de scho wider. Emu dr Weschte, ds Afrika heisi ja zwöituusig Schprache u nämesech vilech deswäge no meh Zit fürengang, i weis es nid.

Aber di angere sötte Bärndütsch lehre mit sine länge, schöne Vokale u em relativ langsame Tämpo u viune Pouse drzwüsche. Ja, das me richtig Zitt hett für sech zwüschiche am Chopf z chratze. Das mache nämlech o d Zürcher oder d Basler u sowiso d Amis o nid, di chratzesech höchschtens nervös am Füdle.

Nei, zwüschiche muesch e Qualitätspouse mache bim Schnure, sägeni geng. So das me sech cha überlege, wis witergeit u das es e Gattig macht. De hei d Gedanke nämlech schön Zitt, eim i Sinn z cho u z riife, bevor me se uselat u i d Wäut setzt, u de würd me nid z Läbe verjufle u aus i Untergang tribe. Ja, de wäre nämlech aui nümm so pressant u me hätt wider meh Zitt fürenang, oder? U de gsesch o wider ds Schöne u ds Schtiue u ds Beschouleche am Läbe, u das tät is doch aune guet, oder?

E nu, i ha nid wöue schtöre. Nume no öppis: ire dütsche Zittig hani gläse, Bärn wärdi vo Züri, vo Basu u vo Gänf abghängkt, isch gschtange. He, abghängkt! Mir heige d Entwicklig verschlafe. Sogar Losann u Winterthur u vilech o no Luzärn tüegenis nächschtens überhole. Ja, mir heige irgendwie eifach di wirtschaftlechi Entwicklig verpfuuset, o di demografischi, heisi gschribe, da di Dütsche. U das kontinuierlech scho sit achtzäachtevierzg. Bärn sig eifach e ke Metropolitanregion!

Hehe. Metropolitanregion!

I weis ja nid, öbs würklech so isch. Aber wes schtimmt: jä, ii ha nüüt dergäge. Das passt eigentlech guet zum Bärtschi. U fröit ne.